ASK: Çmimet e prodhimit në Kosovë u rritën për 4,1% në tremujorin e dytë 2025 – Energjia me ngritjen më të madhe

Agjencia e Statistikave të Kosovës (ASK) ka publikuar të dhënat e Indeksit të Çmimeve të Prodhimit për tremujorin e dytë të vitit 2025 (prill-qershor), sipas të cilave çmimet e prodhimit në vend kanë shënuar rritje prej 4,1% krahasuar me tremujorin e parë të këtij viti.

Sipas ASK-së, ngritja më e madhe e çmimeve është regjistruar te sektori i energjisë elektrike, gazit, avullit dhe furnizimit me ajër të kondicionuar, me një rritje prej 16,7%.

Rritje të tjera të çmimeve janë shënuar edhe në:

Shtypjen dhe riprodhimin e mediave të incizuara (9,3%),

Prodhimin e veshjeve (6,7%),

Prodhimin e mjeteve motorike, rimorkiove dhe gjysmë-rimorkiove (4,2%),

Produktet metalike, përveç makinerisë dhe pajisjeve (2,5%),

Produkte të tjera p.k.t. (1,9%),

Letra dhe produktet prej letrës (1,6%),

Druri dhe produktet e drurit, përveç mobilieve (1,4%),

Produktet ushqimore (0,8%),

Nxjerrja e xehes së metalit (0,3%),

Pajisjet elektrike (0,3%),

Tekstili (0,2%),

Produktet e gomës dhe plastikës (0,1%).

Ndërkohë, një nga faktorët kryesorë të rritjes së kostos së prodhimit është çmimi i energjisë elektrike. Në prill të vitit 2025, ZRrE njoftoi për ngritjen e çmimit të rrymës me 16%, ndërsa nga 1 qershori 2025 të gjitha bizneset e mëdha u larguan nga tarifat e rregulluara dhe u detyruan të gjenin furnizues të energjisë në tregun e lirë.

Ky vendim i Zyrës së Rregullatorit për Energji shkaktoi pakënaqësi dhe protesta nga komuniteti i biznesit, ndërsa disa kompani madje u shkyçën nga energjia elektrike më 1 qershor.